පේ‍්‍රමයේ ලියුකේමියාව

පේ‍්‍රමයේ ලියුකේමියාව

හැකිවේනම් ගණින්නට තත්පර

ඇසෙන තුරු කටහඩක්

ඇසට කාන්සිය ඇත්නම්

දකිනතුරු එක රුවක්

ඉඩ ලැබෙන ඇසිල්ලක

මවයිනම් සිහින කප්පරක්

ඉතා දිගු විනාඩි

ඉතා කෙටි පැය

කාලය සාපේක්ෂයි

සිහිකරයිනම් අයින්ස්ටයින්

ඉතිං ඔබ ආසාදිතයි

ඒ සොදුරු රෝගයෙන්

කොච්චර තිත්ත කසාය බිව්වත්

බෙහෙත් ඇඟට පත්තියන් නොවෙන

සිරුරම රුපියල් සත වලින්

කිරා මැන බැලෙන කල

ඒ රෝගයට

සිරවෙන්න දිය හැකිද

බෙහෙත් තුණ්ඩු බිල්පතක

සූරලා ඉවත ලන

හෙම්බිරිස්සාවක් නොවී

පේ‍්‍රමයට ඉඩදෙන්න

ලියුකේමියාවක් වෙන්න

ලේ ඇට මිදුළු විනිවිදින

(රිවිහාර පින්නදුව)

කවියන් නොවේ කෙරුමන්

කවියන් නොවේ කෙරුමන්

කවියෙක්දැයි නොදන්නෙමි

එනමුදු ලියන්නෙමි

ලියන උන් කවියන්නම්

මමත් කවියෙක්මි

විවේක සුව වරප‍්‍රසාදයක්

ගළපා වෙනස් වචනයක්

තවරා සාහිත රසයක්

මහා ලොකු කෙරුමක් නොවේ

සගයිනි ඒකත්

ලෙයින් දහඩියෙන් සැදුණ පොළවක

වපුල කවි බිජුවක්

ඵල දැරූවත් මා නමින්

පැළවන්න පොළවක් නොවේනම්

අරුතක් තියේවිද

පොළවක් මඟ ඇරුණු ගහකට

පෙම්වතිය ගැන

ඇගේ පේ‍්‍රමය ගැන

විප්ලවය ගැන 

ලෙළෙන රතු ධජ ගැන

ලියූ දහසක් කවි කැටි කොට

හිලව් කරනෙමි

අරගල බිමක හෙළන

එක දහඩිය බිඳුවකට

සමාජ ජාලා පුරා

මහා බර වදන්

ලයික් ගොඩ ගැහුවට

ක්ෂණික වීරයින් බිහි කෙරුවට

පැසසුම් නොලඹනා වීරයින්

ඇත මේ අවකාශයෙන්

එපිට සොයුරනි එමට

වර්ණනා අභියස

නොලැබිය යුක්තක් ලබන

අපුලක් දැනේ ඉඳ හිට

උන් යන මගට

දහිරිය දෝතක් රැගෙන යනු මැන

එයම වේ අසෙනිය පූජාව

වීරයන් නමට

පරමාදර්ශ මියැදුනද

තවමත් වීරයින් ඇත

උන් අපි වැනිම මිනිසුන්ය

අත හරින්නට බල කෙරෙන

නිමේෂෙක තව තවත්

ආදරෙන් සිහිනයන් වැළඳගන්නා

ඉතිං කිව යුතුයි සගයිනි

ඉඩක් ලද මොහොතක

බුකියේ මොකක් හරි කුරුටු ගානා

කවියන් රැඩිකලූන් ප‍්‍රාඥයින්

නොවේ සගයිනි කෙරුමන්

(රිවිහාර පින්නදුව)

පුරුද්දට බැලෙනවා

පුරුද්දට බැලෙනවා

නැද්ද මග ඇරුණු ඇමතුමක්

කෙටි පණිවිඩයක්

දෙදරද්දි ෆෝන් එක

මෙහොතකට හද පිරී තුටින්

දැක නුඹෙන් නොවන වග

මුකුලිතව හදවත

ඉතිං නුඹ අමතන්න

පාළුයි මට නෙමෙයි

ජංගම දුරකථනයට

රිවිහාර පින්නදූව

විහඟුන් අයිති අහසට

විහඟුන් අයිති අහසට

අමතක කරන්නට

බැරි මතක කෝටියක්

සුසුමකට හැකිවේද

පිටකර හරින්නට

කදුළුවල බරකිරා

හැකිවේද රත්තරනින් ගෙවන්නට

සා පැටව් මරු විකලෙන්

උනුන් මරාගන්නා කලෙක

වෘකයින් පාඩුවේ

ගොදුරු අනුභව කෙරුව

වැරදුණේ අපි හැමෝටම

හීනවලට ගිණිබින්ද

විහගුන් සිරකෙරුව

ඒ ලේ තැවරිච්ච පිංකමට

අපිත් බැති සිතින්

සාධුකාර දුන්නු

ඉතුරුවුණු ක්ලේමෝ

පුපුරන්නෙ හදවතක

උන්ට තවත් මෝටාර්

ගහන්නේ මොකටද

පොල් රුප්පා යට

වැළලූව සමනළ කෝෂ

තාමත් තටු දිගහරින්නට

පෙරුම් පුරනවා රහසෙම

තල් අරණෙ විහඟ කැදලි

ගිණි අරන් මේ දැනුත්

විහඟුන් අයිති අහසට

දැන්වත් යදම් බිඳ

උන්ට පියඹන්න ඉඩදෙන්න

(රිවිහාර පින්නදුව)

ඇවන්ගාඞ් පේ‍්‍රමය

ඇවන්ගාඞ් පේ‍්‍රමය

ඇවන්ගාඞ් 

නුඹ කොයිතරම් සුන්දරද

මං දන්නෙ නෑ ඇවන්ගාඞ්

මට තේරෙන් නෑ ඇවන්ගාඞ්

ඇයිද මේ තරම් පේ‍්‍රමයක්

පත්තර පිටු වසන්

මාධ්‍ය ගුවන් ගැබ අරා

නුඹ යාත‍්‍රා කරනවා

වතුර විස උන මිනිස්සු බැඳගිරිය

වකුගඩු නරක්වුණු ගොවියො රජරට

තවත් දහසක් දෙන

දහසක් දේ

සැමට වැඩියෙන් නුඹ ගැනම

උන් කතා කරණවා

හීනෙනුත් ඒ නමම දොඩනවා

ඇවන්ගාඞ් ඇවන්ගාඞ්

මං දන්නෙ නෑ ඇයි කියා

නැවකට මුවා කල

බොහෝ දේ ඇත ඇවන්ගාඞ්

රළ පෙරළි විත් නුඹ සිපගන්න නිමේෂෙක

කරදිය සුළඟ සමඟින් මුසුව

මේ හමන්නේ

හිවල් දේශපාලන

පිළී ගඳ නොවෙද ඇවන්ගාඞ්

රිවිහාර පින්නදූව

දැන් පොත් හරි ගණන්

දැන් පොත් හරි ගණන්

අකුරු සුවඳට ඉගිකර

සැහැල්ලූ වෙච්ච පර්ස් එකට රව රව

අපිත් ගියා පොත් සංදර්ශනයකට

පොත් වලට අත ගහල සාධු කියන්න

ගේට්ටුව ළග ඉදන්

ප්‍රොමෝෂන් අපේ උන්

”අයියෙ සිම් එකක් ගන්නකො”

කෑම කඩවල බීම හට්වල

දන්න හදුණන මූණවල් හිනාවෙන

දවසෙ කුළියට මුදලාලිල

”මල්ලි පොත් ගත්තද?”

”නෑ අයියෙ 

මේ ස්ටෝල් එක බලා ගන්නෙ අපි”

බනින්නෙ කොහොමද මුන්ට

පොත් ප‍්‍රදර්ශනයක් තියෙන්නෙ

හම්බකරගන්නද?

පොත් ප‍්‍රදර්ශනයක් තියෙන්නෙ

හම්බකරගන්නනෙ

උන් අච්චර හොයද්දි

උඹලත් කීයක් හරි

හම්බකර ගත්තම මොකද

සතියක් හමාරක් බඩකට පුරවගන්න

ෆෝන් කාඞ් එකට

ප්ලේන්ටියට සිගරට් එකට

හැමදාම වැඩ කළොත්

අන්තිම දවසෙ පොඩි අඩියකට

කොත්තු මී කකා

නෙස්ක කැෆේ බොනකොට

සෙල්ෆියක් ගහල

හරි ජොලිනෙ අපි සෙට් එකම

ගත්ත පොත් ලිස්ට් එකම 

බුකියෙ දානකොට

මොන තරම් ඉරිසියද අපට

කියවනවලූ පොත් ගොඩක්

154 හිරවෙලා

ගෙදර යනකොට

මරදානෙ මගී පාලම උඩ

වැඩ ඇරිල දුවන

දහසක් මුහුණු

පුස්තකාලයකි මට

කියවන්න

සමාජය ජීවිතය සහ මාව

(රිවිහාර පින්නදූව)

මේ බැරියර් පෙරළන්න

මේ බැරියර් පෙරළන්න

ඉපදුනානම් ඉතිං

ලෑස්තිවෙන්න මොන්ටිසෝරි යන්න

හැංගිමුත්තන් කරල කොහොමද

ශිෂත්වෙ පාස් වෙන්නෙ

ඕලෙවල් ඒලෙවල්

කොහෙද අපිට වෙලාවක්

පෙනහළු පිරෙන්න 

නිදහසේ හුස්ම ටිකක් ගන්නවත්

ළමා කාලය යොවුන් විය

කොහෙද අපිට සුන්දර

ටාගට් කවර් කරණව විතරයි

ඉතිං ඔයා එනවද

මේ බැරියර් පෙරළන්න

පුළුවන් තරම් දුර ඉගෙන ගන්න

හොද රස්සාවක් හොයාගන්න

ලස්සන ගෙයක් හදන්න

වාහනයක් ගන්න

හොද තැනකින් කසාදයක්

දරුවො ටිකක්

අන්තිම කාලෙ

අනේ අපි පන්සල් යන්න

කවුදෝ හදපු තනුවක්

අපි හතිදාගෙන ගහන එකද

ජීවිතය කියන්නෙ

ඉතිං ඔයා එනවද

මේ බැරියර් පෙරළන්න

හුස්ම පොද විස කෙරුව

වතුර ටික මිළ කෙරුව

මිනිස්කම සතපවා

නරුමකම අල්තාරයේ ඉන්දුව

තව කොච්චරනම් කලක්

නව ලිබරල් ධනේෂ්වර ශීලය

අපි සමාදන් වෙනවද

මේ ක‍්‍රමයෙ බැතිමතුන් වෙනවද

ලාභෙට වන්දනාවෙ යනවද

බැංකු ගිණුමෙන් නිවන් දකිනවද

වෙනසක් ඕනෙ නැද්ද

ඒකට දහිරිය නැද්ද

සමනළ සිහින දකින

දෙබරෙක් වෙන්න

ඉතිං ඔයා එනවද

මේ බැරියර් පෙරළන්න

රිවිහාර පින්නදූව