පෙම්වතියට පෙම් කවියක්

පෙම්වතියට පෙම් කවියක්

දකින්නට පෙරුම් පුරන

ඇසිල්ලක හද සසළ කරනා

අනන්තෙට සිත පාව ඇදෙනා

‍නුඹේ සිනහවක්

අකුරු කරණට

පොත් පිටු ගණන්

මං කොච්චර ආසද

ලියන්නට පෙම් කවියක්

ඒත් රත්තරනෙ

දහස් ගණන් පොඩි එවුන්

බඩසයින් අඩනවනෙ

නුඹේ අත අල්ලගෙන

පරිස්සමට ලෝභකමින්

හෙමි හෙමිහිට අඩි තියන්න

ඔට දෑසට එබී

විදසුන් වඩන්නට

ප්රේුමයේ මාර්ග ඵල ලබන්නට

විශ්වයම නතරවෙන ඇසිල්ලක

සීරුවට ජීවයේ සාරයම

නු‍ඹෙ දෙතොලෙ තවරන්න

රෑ ගණන් නිදි මරා

ඒ හැගුම කවියකට දමන්නට

මං කොච්චර ආසද

ඒත් රත්තරනෙ

ධනයේ වෘකයින් ඇහැරිලා

පන්හිදම තුරුළු කොට දෑතට

ගිණි අවිය කොට එයම

අකුරු වෙඩි උණ්ඩ වස්සන්න

පෙරමුණේ සටන් කරණා සොයුරන්ට

පුංචිම උදව්වක් හරි වෙන්න

කඩු කිණිසි මැද උන් එක්ක

රෝස මල් ගෙන ඇවිදින්න

මල්ටි බැරල් එන දෙසට

හදවත දමා ගසන්නට

පුපුරලා හැමෝම

සෙනෙහසින් බරපතළ තුවාල ලබන්නට

රත්තරනෙ අපිත් යමුද

උණුසුමට තුරුළු වී

ලෙයින් පෙගුණු

පිච්ච මල් පූදින සටන් බිම වෙත

එබිම කොහේ හෝ කොනක

ලියන්නෙමි පෙම් කවිය නුඔ නමින්

නොමැකෙන්න ලොකුවට

හරිම සරළව

එකම වදනකින්

"ආදරෙයි"

(රිවිහාර පින්නදූව)

( https://www.facebook.com/photo.php?fbid=822917227785029&set=a.169941886415903.41399.100002002790094&type=1&theater&notif_t=like )

අවුරුද්ද සුභයි මට

අවුරුද්ද සුභයි මට

බඩසයින් හඩන

හැම මිනිහෙක්ම හොයන් ගොස්

කිරිබත් කටක් කවන්නට

ඉතිං හැකිනම්

අවුරුද්ද සුභයි මට

ජාතියක් ආගමක්

නමින් ඉරි අදින

පැළුණු හදවත් දාර මත

සෙනෙහසක් ගල්වන්න

ඉතිං හැකිනම්

අවුරුද්ද සුභයි මට

හදවතට ඉඩදී තටු සළන්නට

අනන්තය වෙත නෙත් යොමන්නට

වෙරළ ඉම හුදෙකලා ඇසිල්ලක

ප්‍රේමයේ දැහැනට සමවදින්නට

දිග පළල මනින්නේ නැතිව

කෙනෙක් මුව සිපගන්න

ඉතිං හැකිනම්

සුභයි මට අවුරුද්ද

අට්ටාල මත ගුලිවෙලා

සටන අතනෑර

කිරිබත් කැවුම් අතහරින

සොයුරන් නගා ජය ඝෝෂා

අතින් අල්ලන්

මග බලන් ඉන්න අම්මලව

බලන්නට ගමට එක්කන් යන්න

ඉතිං හැකිනම්

අවුරුද්ද සුභයි මට

හෙට දළුලනා හීනයක

අද සටන් කරණා මිනිසුන්ට

ජවය දෙන කවියක්

ඔවුනොවුන් මුවග මුමුණන්න

ලියා පාකර හරින්නට

ඉතිං හැකිනම්

අවුරුද්ද සුභයි මට

හමුවෙනා හැම නෙතග

ආදරේ තවරන්න

ජීවිතේ යදම් බිද

නිදහසක් මොරදෙන්න

රක්ත වර්ණිත ධජ

මේ අහස සරසන්න

ඉතිං හැකිනම්

අවුරුද්ද සුභයි අපිට

( රිවිහාර පින්නදූව )

( https://www.facebook.com/photo.php?fbid=818562614887157&set=pb.100002002790094.-2207520000.1429255425.&type=3&theater )

71 පණිවිඩය

පුතේ උඹ දන්නවද..............

පුතේ උඹ දන්නවද

එරබදු ගහේ මල්

රතු පාට ඇයි කියල

කොවුලන් ගයන ගී

කාටද කියල

එකෝමත් එක කාලෙක

නෙමෙයි ඒ 71

රජ කුමරුවන් හෙම නෙමෙයි

උන් ගමේ කොල්ලො ටික

චේ ගු ආ කාරයෝ

ඒ උන්ගෙ නම්බුව

ආණ්ඩුවෙ ඉස්කෝලෙන්

අකුරු ටික ඇහිදගත්තු

අප්පච්චිල වගේ

වළව්වට කඹුරන්න

බෑ කිව්ව උන්

පන්සලේ පොඩි නමත්

එක්කලා කසු කුසුව

රතු පාට පොත් නිතර

එහෙ මෙහේ මාරු වෙන

වැහි කෝඩෙ ආව හැටියට

අපි හිතුව වහින බව

ඒත් උන් කිව්වෙ නෑ

දැන් මොකක් වෙන්න යන

ගහ පුරා මල් කැකුළු

වසන්තෙට ඉගි මැරුව

සුවද මකරන්ද

ඉව කරණ සමනළකෝෂ

අළුත් උපතක් පතා

සැරසිලා මග බැලුව

බක් මහේ අකුණකින්

කරටියම කැබලි වී

මහ දවල් රෑ වුණා

ඇස් නිලන්කාරව

අපි ඔහේ බලන් උන්න

මහ දවල් දිවි පුරා

අපි නිදන් ඉන්නැද්දි

පුතේ උන් අරුණටත්

කලියෙන් ඇහැරුණා

වෙනසක සිහිනයෙන්

ඒ දෑස් දැල්වුණා

පැතූ ලොව අභියසදි

අමු සොහොන ඉදිවුණා

නව ලොවක් පැතු වරදට

අනේ උන් වැළලුවා

වඩා යහපත් ලොවක

අධිටනක් සිත දැරුව

උන් වතින් ගලා ගිය

රුධිරයෙන් එරබදු මල්

රතු පැහැය ගැන්වුණා

එදා ඉදන් කොවුලන්

ගී ගයනව බක් මහට

71 පණිවිඩය

තමයි ඔය කියන්නේ

ඒ ගීය උඹලටයි

උන්ට වැරදුණු තැන් හදාගෙන

පුතේ උඹ දන්නවද

නව ලොවක් හෙට දවසෙ

ගොඩනගන්නේ උඹලයි.............

( රිවිහාර පින්නදුව )

( https://www.facebook.com/photo.php?fbid=626757620734325&set=pb.100002002790094.-2207520000.1428163765.&type=3&src=https%3A%2F%2Fscontent-sin.xx.fbcdn.net%2Fhphotos-xaf1%2Ft31.0-8%2F10010397_626757620734325_6246984261578456906_o.jpg&smallsrc=https%3A%2F%2Fscontent-sin.xx.fbcdn.net%2Fhphotos-xaf1%2Fv%2Ft1.0-9%2F1507922_626757620734325_6246984261578456906_n.jpg%3Foh%3Dfdd4cc90e808ffa0c5d4ecd29b2ea38f%26oe%3D559B4993&size=1920%2C1200 )

අධි පීඩන මල් වැස්ස යටින්........

අධි පීඩන මල් වැස්ස යටින්........

අම්මගෙ ආදරේ

කිරි පිටි පැකට් එකක හිර කරපු

තාත්තගෙ රැකවරණය

රක්ෂණ ඔප්පුවෙන් මනින

ලස්සන කරන්නම දගලන

කැතම කැත නගරෙක

Macdonald ළගින්

KFC පහු කරන්

අපි යනව පෙළපාලි

ODEL එක ගාවදි

ඇස් කඩන් යන දැන්වීම් පුවරැ යට

උගුර ලේ රහ කරන්

මොර දෙන සටන් පාඨය

"අධයාපනය වෙළද භණ්ඩයක් නොවේ "

අධි පීඩන මල් වැස්ස යටින්

කදුලු ගෑස් මීදුම අතරින්

ගිණියම් කාපට් පොළව

දහඩියෙන් පෙගිල මදිනම්

බැටන් පොලු සන්ග්‍රහයට

බොහෝම ස්තුතියි

එවාපන් වෙඩි උණ්ඩ

රතු ලෙයින් දෝවනය වන දාට

ටිකක්වත් මග ඇරෙයි

ආශ්චර්යයේ මළ පුලුටු ගද........

( රිවිහාර පින්නදුව )

( https://www.facebook.com/photo.php?fbid=495503170526438&set=pb.100002002790094.-2207520000.1427893978.&type=3&theater )